TXHUA YAM HAUV YUS LUB NEEJ YOG LOS NTAWM TSWV NTUJ

Nyob zoo cov niam txiv kwv tij phooj ywg sawv daws, cov uas nej tab tom nyeem tsab ntawv Tseb Nplej no. Kuv yog Txawj Tsav Meej Mom xeem Lauj. Kuv zoo siab uas tau tuaj ntsib thiab nrog sawv daws sib tawm tswv yim kev ntseeg ua ke rau hauv tsab ntawv no. Kuv zaj lus yuav piav rau sawv daws tau nyeem nyob hauv hnub no, mas muaj lub ntsiab lus tias : “Txhua yam nyob hauv peb lub neej yog los ntawm Tswv Ntuj.”
Nej puas xav ib yam li kuv hais no thiab?
Tej zaum ntau leej yuav tsis xav li ntawd, vim lawv xav tias txhua yam ntawm lawv lub neej yog los ntawm tus kheej los, yog tshwm sim raws li lawv ua thiab raws li lawv txoj kev npaj tseg xwb. Tab sis kuv ntseeg tau tias yuav muaj ob peb leeg xav li qhov kuv tau hais los saud no thiab.
Ntawm kuv tus kheej kiag, mas kuv yog ib tug ntseeg Tswv Ntuj txij puag thaum kuv yug los lawm. Thaum ub twb tsis xav li thiab, tab sis tom qab no kuv tau los nrog lub koom haum ‘Zoo Tswv Zov Yaj’ ua hauj lwm lawm, kuv mam xav txog tej yam tshwm sim hauv kuv lub neej yav tag dhau los, ua rau kuv pom tias ‘txhua yam hauv kuv lub neej, yog los ntawm Tswv Ntuj, yog Tswv Ntuj muab rau kuv’. Tsis hais yam uas kuv tau thov txog, los tsis tau thov. Thaum kuv pom li no thiaj ua rau kuv ntseeg tias : ‘Txhua txhua yam twb los ntawm Tswv Ntuj thiab Tswv Ntuj yeej nrog yus nyob ua ke nraim.’

"Tos yus tsis pom thiab tsis paub txog, twb yog yus tsis qhib yus lub siab thiab yus txoj kev xav xwb."

Kuv hais los no ntshe yuav muaj qee leej xav tias kuv lam hais lus cuav lus dag xwb. Li ntawd, kuv thiaj yuav muab kuv lub neej uas Tswv Ntuj tau pub rau kuv coj los nthuav tawm rau sawv daws tau nyeem ua ke nyob hauv tsab ntawv no.
Thaum kuv nyuam qhuav kawm ntawv tiav nyob rau nram nroog ‘Bangkok’, mas kuv xav hauv nruab siab tias kuv yuav los nrhiav hauj lwm ua nyob ze tsev thiaj tau los nrog 2 tug laus nyob. Vim tshuav kuv niam tais thiab kuv niam nkawd nyob hauv tsev xwb. Tej zaum Tswv Ntuj paub kuv txoj kev xav no, ces muaj ib hnub kuv tus tij laug raug xa los ua hauj lwm nyob rau pem xeev Phetchabun. Cov thawj coj kom nws nrhiav ib tug los ua nws luag, nws thiaj tau nug seb kuv puas kam ua qhov hauj lwm ntawd.
Thaum kuv tau hnov li no, kuv thiaj li sau khaub ncaws nrog kuv tij laug los ua hauj lwm nyob ze tsev raws li kuv xav cia.
Ua tau ib ntus thaum hauj lwm yuav tiav, ces lawv tsis muaj nyiaj ntiav kuv lawm. Ntshe tej zaum kuv yuav kawg rov qab lawm nram nroog xwb, thiaj muaj hauj lwm ua. Tab sis kuv lub siab yeej tsis kheev kiag li.
Tej zaum Tswv Ntuj hlub kuv, nws thiaj tau muab ib txoj hau kev rau kuv. Lub sij hawm kuv tab tom nyuaj siab no, kuv tau hnov ib tsab xov tuaj ntawm Lub Tsev Sim Cog Qoob Loo tias lawv xav tau ib tug tub ua hauj lwm saib xyuas paj ntoos thiab qoob loo. Txawm tias kuv txoj kev kawm tsis yog fab no los xij, kuv lam ua ib siab mus rau npe seb puas tau. Thaum txog caij, lawv thiaj hu peb plaub leeg uas rau npe ntawd mus tham thiab nug txog kev kawm, ces lawv hais tias kuv yog tus tau ua lub luag hauj lwm ntawd. Ua rau kuv zoo siab kawg, vim qhov chaw ua hauj lwm yog nyob hauv kuv lub zos, nrug deb ntawm kuv tsev li 2 lav kev xwb.

‘Thaum ntawd, kuv xav tias tej no yog kuv txoj hmoo, los yog tej zaum muaj hauj lwm los ncaj kuv xwb.’

Tsis ntev, kuv kuj tau yuav poj niam thiab muaj me nyuam, ces muaj kev siv nyiaj txiag ntau ua rau nyiaj hli tsis txaus siv. Kuv xav nrhiav dua lwm txoj hauj lwm tshiab los yog tej yam los ua ntxiv. Kuv tsis paub yuav ua li cas, ces kuv thiaj tau thov txog Tswv Ntuj kom nws pub ib txog hau kev rau kuv. Kuv tau tso kuv tej kev nyuaj siab tag nrho rau Tswv Ntuj, kom nws ua tus coj kuv li lub teeb uas taws thaum tsaus ntuj kom yus pom kev. Tsis ntev Tswv Ntuj tau teb kuv cov lus thov ntawd.
Tswv Ntuj teb li cas ne? Kuv mam piav txuas ntxiv rau sawv daws tau nyeem ntxiv mus.
Muaj ib hnub, ib tug tub ua hauj lwm nyob hauv Zoo Tswv Zov Yaj tau tuaj nrhiav kuv. Nws nug kuv seb puas xav nrog lawv ua hauj lwm us ke, qhov hauj lwm no yog muab cov zaj uas lub tshuab tshaj xo Zoo Tswv Zov Yaj tau tshaj tawm tas lawd, coj los tso dua nyob rau ntawm xov tooj cua Hmoob Toj Siab nyob hauv zos Khej Me uas yog lub zos kuv nyob. Txhais tias ua ib tug tub hais lus nyob hauv xov tooj cua ntag!
Chiv thawj kuv kuj tsis tau txiav txim siab ua kiag, vim kuv yog ib tug hais lus Hmoob tsis meej pes tsawg thiab tsis paub hais lus kom ntxim sawv daws siab, ntshai tsam ua tsis tau qhov hauj lwm no.
Kuv coj los pw xav, kuv mam xav txog qhov uas kuv tau thov Tswv Ntuj, mam xav txog tej yam thaum kuv tseem me me; kuv xav ua ib tug neeg pab tshaj Ntuj Lus. Mam xav txog ntawm yus kev kawm ntaub kawm ntawv thiab yus xeem lus Hmoob uas yuav xav kawm xav paub.
Muab tej no los xav tag, kuv thiaj pom tias : ‘Txoj hauj lwm no, twb yog Tswv Ntuj npaj rau kuv thiab muab rau kuv ua lawm ntag.’
Li ntawd, kuv thiaj txiav txim siab ua txoj hauj lwm no rau hnub tim 1 lub 11 hlis xyoo 2014 los txog rau niaj hnub nyem no.
Cov kwv tij phooj ywg sawv daws! Tej zaum nej yuav xav tias yam no yog muaj hauj lwm los ncaj xwb los nyob ntawm nej xav, tab sis nej yuav tsum muab xav kom ntxaws tias : nws puas yuav muaj tej yam nyob nyob lam tshwm tuaj zoo cuag no lod.
Txhua txhua yam tshwm sim, nws yeej tsis yog lam xwb, tab sis nws yog tej yam xwm uas yus ntsia tsis pom tuav tsis tau. Kuv ntseeg tias yog tej yam tseeb tuaj ntawm Tswv Ntuj, yam li tsob ntoo yog tsis muaj paus, yeej tsis muaj lub ntsis li. Tsis tas li xwb, ntawm peb cov twb coj txoj kev ntseeg los ntev lawm, mas tej zaum yus ntsia tsis pom qhov uas Tswv Ntuj pub rau yus, thiab Tswv Ntuj nrog yus nyob.

Vim Tswv Ntuj twb ua ntau ntau yam rau yus, ces ua rau yus xav tsis txog lawm.

 Tab sis cov uas nyuam qhuav los txais kev ntseeg, mas lawv pom meej thiab zeem tseeb tias tau raws li qhov lawv thov.
Kwv tij phooj ywg sawv daws, nej txhob ntaus siab yau rau nej txoj kev ntseeg, rau nej tus Tswv Ntuj mog. Nej yuav tsum nquag thov Tswv Ntuj kom nws pab qhib nej lub siab, ces nej yuav pom tias : txhua yam nyob hauv nej lub neej, yog Tswv Ntuj ua tus pub rau nej thiab nws niaj hnub nrog nej nyob nraim.
Hnub no kuv tuaj ntsib nej thiab tham los xaus li no xwb. Peb mam rov sib ntsib sib tham dua rau lwm tsab ntawv. Thov Tswv Ntuj foom hmoov zoo pub rau nej txhua leej txxhua tus mog.

Tus sau : Txawj Tsav Meej Mom Lauj (Tseb Nplej 2016)