CARITAS PAB COV NEEG TUAG NYOB LIS NPAAS TEB.

Tom qab uas cov tuam tsev nyob ntawm lub tshav nres nkoj kub hnyiab thiab ua rau neeg tuag coob leej, cov raug mob yog 5,000 tawm leej, mas cov Caritas nyob Lis Npaas teb tau npaj siab pab cov neeg raug kev kub ntxhov ntawd. 
Rita Rhayem uas nws yog tus thawj coj ntawm cov Caritas Lebanon hais tias : zaum no yog thawj zaug uas lawv tau ntsib teeb meem loj heev, tab sis cov Caritas yuav tsis tso tseg thiab lawv yuav ua cov hauj lwm pab cov neeg tau txais kev txom nyem zaum no ntxiv mus. 
Hais txog kev kub hnyiab nyob Lis Npaas teb, mas ua rau neeg raug mob coob kawg thiab ua tsoom pej xeem tsis muaj vaj tse nyob, ces lawv tau txais kev txom nyem loj kawg nkaus. Yog ib yam teeb meem loj uas tsis tau tshwm sim dua li, vim li ntawd kev pab tsoom pej xeem thiaj yog ib qho nyuab tag nrho. Tej tsev kho mob thiab cov kws kho mob kuj muaj tsis txaus. Tej hluav taws xob tuag tas, yuav ua hauj lwm dab tsi kuj tsis yooj yim. 
Tam sim no cov neeg tuag muaj tshaj 100 leej thiab cov raug mob coob tas nrho, muaj ntau pua yim neeg lawv tsis muaj vaj tsev nyob, tsis paub yuav nyob qhov twg. Ces tam sim no lub nroog Npes Lus kub ntxhov kawg nkaus. Yog thawj zaug uas cov Caritas ua hauj lwm hnyav tshaj thiab lawv maj mam faib txhiam xws faib tshuaj pub rau tsoom pej xeem noj. Cov tub khaws neeg tuag thiab tsoom pej xeem maj mam cheb tej nyuag qias neeg thiab sw sw pov tseg, kom lawv tau zoo tshawb nrhiav cov neeg ploj lawm. 
Muaj coob leej neeg nyob tej tus ntsoos ntsoos, vim lawv ntxhov siab thiab xav kom muaj neeg nrog lawv tham. Cov Caritas nyob Lis Npaas thov kom tas cov Caritas nyob thoob ntiaj teb nrog cev tes mus pab txhawb nqa lawv. Vim kev pab tsoom pej xeem Lis Npaas zaum no yog ib yam uas tsim nyog sawv daws yuav tau kub siab, tsis yog ib yam maj mam ua tau.