TSA TSWV QHIA TSHIAB NYOB FIS LIS PEES TEB

Hnub tim 21 lub 5 hlis 2020 no, Vaj Qhia Fas Ntshis Kus tau tsa Txiv Plig Charlie Malapitan INZON, OMI ua Tswv Qhia nyob hauv lub nroog Khos Tas Npas Tos, nyob Fis Lis Pees teb. Kuj yog ncaj tib hnub uas Leej Ntshiab Aws Zes tau txhim tsa lub Koom Haum OMI thiawb. Nyob hauv lub nroog Khos Tas Npas Tos, mas kuj muaj Txiv Plig Orlando Cardinal Quevedo, OMI uas yog thawj tug Tswv Qhia thiab. Tam sim no nws hnub nyoog laus lawm, ces nws so tsis ua hauj lwm. Vaj Qhia kuj Tsa Txiv Plig Jose Colin Bagaforo ua Tswv Qhia nyob Kidapawan thiab. Hnub ua cov kab ke tsa Tswv Qhia tshiab ntawd, mas tsuas muaj cov neeg ntseeg tuaj koom lub thaj txi Ntuj li 10 leej xwb, yog vim tus kab mob Covid-19, ces cov tseem hwv txwv tsis pub tsoom pej xeem sib sau nyob ua ke coob coob. Nyob hauv lub thaj txi Ntuj, mas tus Tswv Qhia tshiab INZON tsis tuaj yeem yuav coj nws ntiv nplaib thiab nws tus cwj ua Tswv Qhia tuaj, ces nws thiaj siv Tswv Qhia Npes Ntsas Mis uas twb tuag ua tim khawv lawm ntiv nplaib thiab tus cwj ua Tswv Qhia ua thaj txi Ntuj. Hnub ntawd, tus Tswv Qhia tshiab INZON xaiv ib lo lus tias : “Koj yog kuv tus phooj ywg.” Tswv Qhia xav qhia tias sawv daws sib luag zos, tsis muaj ib tug loj ib tug me. Lub Cheeb Koom Txoos nyob Khos Tas Npas Tos, mas cov OMI yeej ib txwm ua tus kav txij xyoo 1939 los lawm. Vim li ntawd, TXiv Plig Npes Ntsas Mis thiab ntau pua tus neeg ntseeg thiaj raug tuag ua Yes Xus tim khawv nyob Fis Lis Pees qab teb. Cov neeg ntseeg nyob Khos Tas Npas Tos feem coob yog cov Mawv Xis Lim. Hnub tim 27 lub 1 hlis xyoo 2019 tsaib no, tau muaj ib lub hoob pob tawg nyob hauv ib lub tsev teev Ntuj nyob Ntsos Los, ua rau neeg tuag 20 leej thiab raug mob 116 leej.