212 TUS NEEG TAWM TSAM TIV THAIV KEV TXUAG XYOOB NTOO TUAG

Hais txog cov neeg tawm tsam tiv thaiv kev txuag xyoob ntoo nyob rau 2019 tsaib no, mas twb ua rau muaj neeg tuag 212 leeg lawm. Cov neeg raug tua tuag ntawd, lawv tiv thiab ua txhua yam kom tau txuag xyoob ntoo, lawv yog cov tsis xav kom neeg ntov hav zoov. Kos Loos Npias teb thiab Fis Lis Pees teb yog 2 lub teb chaws uas muaj cov neeg txuag hav zoov raug tua tuag coob tshaj. Dhau ntawd mas yog Nplas Xis teb, Hoos Dus Las teb thiab Kuas Tes Mas Las. Cov neeg raug tua tuag, 40 feem pua yog cov neeg nyob hauv nroog thiab nyob hauv 10 leej, mas ib leeg yog poj niam. Cov neeg nyob hauv nroog, lawv nyob xyaw cov hav zoov ntawm As Mes Lis Kas Nrab thiab As Mes Lis Kas Naj. Niaj xyoo muaj neeg nyiag ntov ntoo ntov hav zoov ntau tas nrho. Tej suam teb chaws kuj muaj cov tub tseem hwv nyiag ua luam ntoo thiab. Kev luaj teb cog qoob loo yog luaj hav zoov nyob As Xias teb, cov neeg tuag 34 leeg yog nyob Fis Lis Pees teb. Muaj 2 tug neeg Is Ntos Nes Xias uas nkawd yog cov tub tseem hwv soj ntsuam xyoob ntoo kuj raug neeg xuas riam nkaug tuag lub 10 hli tsaib no, nyob ze ib lub vaj txiv ntoo roj uas nyob qaum teb ntawm lub pov txwv Xum Mas Ras. Kev hlawv toj thiab luaj teb ntov ntoo, yog ib yam teeb meem loj uas ua rau neeg tuag tsis tseg. Nyob Fis Lis Pees teb, tus thawj coj ntawm haiv neeg Manobo raug dav hlau tso hoob pob tua tuag lub sij hawm nws coj tsoom pej xeem tawm tsam hais txog kev khawb cov qhov thee av nyob qaum teb ntawm lub xeev Mis Ntas Naus. Lub hav zoov Vaws Ntsis uas tam sim no tseem muaj nyob Fis Lis Pees teb, mas yog haiv neeg Manobo nyob thiab lawv txuag cia. Tab sis tam sim no lub hav zoov ntawd tab tom raug neeg nyiag ntov ntoo thiab khawb qhov thee av, khawb nyiaj khawb kub. Cov kev lag luam no ib feem yog los ntawm cov tseem hwv Fis Lis Pees. Cov tseem hwv lawv muaj txoj cai txuag tej hav zoov xyoob ntoo nruj kawg, tab sis ib yam zais ntshis mas yog lawv tso neeg nyiag ua. Vim li no muaj cov Koom Haum saib xyuas thiab txuag hav zoov, uas lawv cov neeg soj ntsuam txog hav zoov thiaj raug neeg nyiag tua tas li.