TXOJ KEV TSOB HWB NTIAJ TEB NEEG NYOB LUB POV TXWV MAS DAS KAS (MADAGASCAR)

Kuv yog Sara Suchowiak, kuv yog ib tug neeg ua hauj lwm nyob hauv lub Koom Haum fab kev ncaj ncees ntawm tib neeg (Redemptoris Missio Humanitarian Aid Foundation).  Kuv tau ua hauj lwm fab saib xyuas kev noj qab haus huv nyob hauv cov OMI lub tsev Befasy. Thaum kuv tseem yau, mas kuv yeej npaj siab lawm tias muaj ib hnub kuv yuav ua hauj lwm pab cov neeg pluag txom nyem. Lub Koom Haum OMI cov hauj lwm ntxim kuv lub siab, ces kuv thiaj txiav txim siab mus ua hauj lwm nyob hauv cov OMI lub tsev Befasy. Tus uas txhim lub tsev Befasy yog ib tug tub ua hauj lwm hu ua Jacek Jarosz uas tam sim no nws yog tus lwm tswj ntawm lub Koom Haum saib xyuas tib neeg kev ncaj ncees thiab kev noj qab haus huv. Nws xam pom tias tsoom pej xeem nyob hauv lub nroog Mas Ntas Npes yog ib co neeg pluag txom nyem thiab nyob deb kev vam meej, ces nws xav mus txhim ib lub tsev noj qab haus huv nyob ntawd. Tsis tas li ntawd, nyob  Mas Ntas Npes tsis muaj choj hla dej, ces lub caij ntuj nag dej loj puv tuaj cov neeg hla tsis tau dej. Thiaj ua rau tsis muaj kwv kho mob mus saib lawv ntau lub hlis. Cov neeg muaj mob nyob hauv lub zos, feem coob yog cov laus thiab cov me nyuam yaus. Thaum ib tug neeg twg muaj mob lawm, mas sawv daws tsuas tau zaum ntsia xwb pab tsis tau dab tsi. Vim li ntawd, lub Koom Haum fab kev ncaj ncees thiaj koom tes nrog cov OMI mus txhim ib lub tsev kho mob Befasy rau tsoom pej xeem nyob hauv lub nroog ntawd. Ces tsoom pej xeem zoo siab thiab tos txais. Qhov no yog ib qho ua rau kuv zoo siab kawg, hais tias cov hauj lwm kuv ua yog ib co hauj lwm muaj nqis thiab tseem ceeb. Kuv kuj qhuas tej yam uas Txiv Plig Marek OChlak ua thiab, vim nws nyiam cov neeg ntseeg thiab cov neeg ntseeg nyiam nws. Txiv Plig Marek OChlak tau txhim kom muaj tsev kho mob thiab tsev kawm ntawv tsoom pej xeem. Ces tam sim no cov neeg nyob ib thaj tsam ntawd tuaj kho mob coob zuj zus. Chiv thawj mas cov neeg mob tuaj ib hnub 400 leej, tab sim tam sim no muaj txog ntau txhiab leej lawm. Fisaora Clement Serge uas nws yog ib tug kws kho mob peb ntiav tuaj kho cov neeg mob npaws thiab cov neeg laus hawb pob, mas nws tsis tuaj yeem yuav kho tau txhua hom kab mob. Ces qhov kawg peb yuav tsum ntiav dua lwm tus kws kho mob tuaj txhab ntxiv. Txawm li cas los kuv zoo siab tias cov hauj lwm peb ua yeej yog zoo heev lawm. 
Kuv thov ua lub Koom Haum OMI tsaug ntau ntau uas tau txais kuv mus ua hauj lwm nyob hauv lawv lub tsev Befasy thiab tau koom nrog lawv txoj kev tshaj Ntuj Lus.