UA HMOOV TSUJ XEEB HAUV TSEV LOJ FAJ

Hnub tim 17 lub 12 hlis xyoo 2019 no, cov ntseeg koom siab ua hmoov tsuj xeeb Yes Xus yug rau cov kwv tij raug kaw hauv tsev loj faj Loom Xam (Lomsak).
Hnub tim 17 lub 12 hlis tas los no, Txiv Plig Txawj Foom (Fr. Thossaphon Narinrak) thiab Txiv Plig Vam Tuam (Fr. Antoine Monsavane) coj cov kwv tij ntseeg Kav Tos Liv hauv zos Khej Me, Loom Xam thiab cov me nyuam kawm ntawv hauv tsev kawm ntawv Leej Ntshiab Yos Xes hauv xeev Phetchabun (St. Joseph Sriphetchabun School) mus ua kev lom zem thiab faib zaub mov rau cov raug txim hauv tsev loj faj Lomsak. Tsis tas li xwb, tus hauj sam Phus Thas saib xyuas tsev teev hawm Phus Thas hauv zos Khej Me kuj tuaj koom nrog cov kwv tij ntseeg Ntuj zaum no thiab.
Thaum 9 teev sawv ntxov, ob tus Txiv Plig thiab ob tus Phauj coj sawv daws tas nrho 40 leeg, yog txiv neej 12 leeg thiab poj niam 28 leeg mus txog tov lub tsev loj faj. Thaum cov tub saib xyuas tsev loj fab soj ntsuam sawv daws tas lawm, sawv daws thiaj mam nkag mus rau sab hauv. Cov tub ntxhais kawm ntawv ua yeeb yam hais txog Yes Xus yug los rau sawv daws saib. Cov raug txim los kuj ua yeeb yam rau sawv daws saib thiab. Tom qab ntawd, Txiv Plig Txawj Foom caw ib tus laus neeg uas nrog nws tuaj los piav me ntsis txog nws lub neej ua neeg raug txim thiab kev ntsib Tswv Ntuj rau sawv daws mloog.
Tus laus neeg no piav tias thaum nws nyob txim hauv tsev loj faj Lomsak no, mas nws txaus siab hawm cov tub saib xyuas heev, vim nws xav tias lawv yog tus saib thiab qhia kom yus txhob poob rau txoj kev txhaum ntxiv lawm. Muaj tej zaus nws qaug zog, tab sis nws thov Tswv Ntuj kom pab nws; yog li nws xav kom sawv daws txhob tso txoj kev ntseeg pov tseg. Nws hais tias : Nej sim thov, ces Ntuj yuav pub rau nej.
Hais txog kab xwm ua hmoov tsuj xeeb rau cov neeg raug txim, mas Txiv Plig Txawj Foom hais tias twb ua los tau 11 xyoos lawm. Chiv thawj mas cov ntseeg hauv zos Lomsak tau xav tias yuav ua li cas thiaj tshaj lub Moo Zoo rau cov neeg txom nyem tau? nyob hauv Ntawv Ntshiab, Paj Lug tau sau tsab ntawv rau cov ntseeg tias thaum nws nyob hauv tsev loj faj puas muaj neeg tuaj xyuas nws, thaum nws tsis muaj khawb ncaws hnav, leej twg muab rau nws hnav. Yog li lawv thiaj txiav siab mus xyuas thiab ua hmoov tsuj xeeb rau cov neeg nyob txim txhua txhia xyoo.

Tus sau : Muas Lauj, Zoo Tswv Zov Yaj